قصيدة تموت من الضحك

لسلام عليكم هذا الشعر للفنان رياض الوادي

الفاتحة

يمنه واحد مات كلنه انمر نشوفه بيه شصار شوفوا المهزله
كمت صحت بحيل اقروا الفاتحه
ولا واحد قرا منهم وستحه
واحد بصفي يهز بالمسبحه
ثاري هاي الناس كلهه مكبسله
شفت كل الجادر مطفي ويلوب
كلت تعبانين اجو من الجنوب
ثاري ياهو اليجي يدكوله حبوب
ذوله اهل الجاي سووا بلبله
انه ما ادري الخبر جابولي جاي
النوب جابولي جكاره وكلاص ماي
ورا نص ساعه ابد ماظلي راي
دخت حسبالي انركعت بقنبله
ثكل عندي لساني ميطلع جمل
كمت ارجف كلي حسبالي شلل
واحد ابصفي رجل شايب تفل
كتله شني القصه كال اسكت حلل
كمت انه ما سولف صحيح
ردت اكومن خفت لا اوكع وطيح
والمعزب كال انته مو مريح
كتله افلت قابل انته مندله

والحقيقه انه خفت ما كمت اشوف
كرسي فارغ يمي حسبالي خروف
ربع ساعه وكامت تهز الجتوف
والزلم عالكاع كلهه مجطله
شايب كبالي نهض لكن وكع
ذب شفقته وكام يركصلي هجع
كتله عيب استحي كلالي وجع
لا تتدخل عابت الخلقه وبله
واجه واحد شربو قوري وربع
ربع ساعه واختلف عنده الوضع
كال اهدي اغنيه حلوه للربع
واطلب اغنية هلا ومية هله
كلها بس اتباوع امطفيه الزلم
ويمي حجي يكول شغلولي فلم
كتله عيب استحي كلي انته انلصم
موتتنه يبو الكذله القاتله

_________تحياتي ابن العراق